Robert Burns (1759–1796). Poems and Songs.
The Harvard Classics. 1909–14.

485 . Song—How lang and dreary is the night

HOW lang and dreary is the night

When I am frae my Dearie;

I restless lie frae e’en to morn

Though I were ne’er sae weary.

Chorus.—For oh, her lanely nights are lang!

And oh, her dreams are eerie;

And oh, her window’d heart is sair,

That’s absent frae her Dearie!

When I think on the lightsome days

I spent wi’ thee, my Dearie;

And now what seas between us roar,

How can I be but eerie?

For oh, &c.

How slow ye move, ye heavy hours;

The joyless day how dreary:

It was na sae ye glinted by,

When I was wi’ my Dearie!

For oh, &c.