Contents -BIBLIOGRAPHIC RECORD

Heathcote William Garrod, comp. (1878–1960). The Oxford Book of Latin Verse. 1912.

Seneca, the younger c.3 B.C.–A.D. 65

The Saying of Orphens

VERVM est quod cecinit sacer

Thressae sub Rhodopes iugis

aptans Pieriam chelyn

Orpheus Calliopae genus,

aeternum fieri nihil.

Illius stetit ad modos

torrentis rapidi fragor,

oblitusque sequi fugam

amisit liquor impetum;

et dum fluminibus mora est,

defecisse putant Geten

Hebrum Bistones ultimi.

aduexit uolucrem nemus

et silua residens uenit:

aut si qua aera peruolat,

auditis uaga cantibus

ales deficiens cadit;

abrumpit scopulos Athos

Centauros obiter ferens,

et iuxta Rhodope stetit

laxata niue cantibus;

et quercum fugiens suam

ad uatem properat Dryas;

ad cantus ueniunt tuos

ipsis cum latebris ferae,

iuxtaque inpauidum pecus

sedit Marmaricus leo

nec dammae trepidant lupos

et serpens latebras fugit.

Quin per Taenarias foris

manis cum tacitos adit

maerentem feriens chelyn,

cantu Tartara flebili

et tristis Erebi deos

uidit nec timuit Stygis

iuratos superis lacus.

haesit non stabilis rota

uicto languida turbine,

increuit Tityi iecur,

dum cantus uolucris tenet;

et uinci lapis improbus

et uatem uoluit sequi;

tunc primum Phrygius senex

undis stantibus immemor

excussit rabidam sitim

nec pomis adhibet manus.

auditum quoque nauita,

inferni ratis aequoris

nullo remigio uenit.

sic cum uinceret inferos

Orpheus carmine funditus,

consumptos iterum deae

supplent Eurydices colus!

sed dum respicit immemor

nec credens sibi redditam

Orpheus Eurydicen sequi,

cantus praemia perdidit:

quae nata est iterum perit.

tunc, solamina cantibus

quaerens, flebilibus modis

haec Orpheus cecinit Getis:

Leges in superos datas

et qui tempora digerit

quattuor praecipitis deus

anni, disposuit uices:

nulli non auidi colus

Parcas stamina nectere:

quod natum est, patitur mori.

Vati credere Thracio

deuictus iubet Hercules.

iam, iam legibus obrutis

mundo cum ueniet dies,

australis polus obruet

quicquid per Libyam iacet

et sparsus Garamas tenet;

arctous polus obruet

quicquid subiacet axibus

et siccus Boreas ferit.

amisso trepidus polo

Titan excutiet diem.

caeli regia concidens

ortus atque obitus trahet

atque omnis pariter deos

perdet mors aliqua et chaos,

et mors fata nouissima

in se constituet sibi.

quis mundum capiet locus?

discedet uia Tartari,

fractis ut pateat polis?

an quod diuidit aethera

a terris spatium sat est

et mundi nimium malis?

quis tantum capiet nefas,

fratrum quis superans locus

pontum Tartara sidera

regna unas capiet tria?